......{ انت المصري}.....
انا المصري انا المهضوم
صراخي جوايا لهيب مكتوم
اجوع اتعري انا المظلوم
عايش كما كنت انا المحروم
تطلعلي لسانها ولاد الروم
وتئلئني تؤلِّي في عز النوم
انت المصري
انت اللي قلت ارفع راسك
في الشهامة والشرف ماسك
لكن داسوك كبار ناسَك
راسك عندهم زي مداسك
طاطيت رميت الحياه ناسِك
لحم البطن ف العظام ماسك
لئن لسانك ف السنان لاصق
انت المصري
رسمت صورتي علي الحيط
اسند دهري زي ابو النطيط
لحد ما جم وهدوا البيت
ارضي ويا ريتني ما بنيت
فدا الكبير علي صرختي سكيت
ما عدت أأوُل انا المصري
انا المصرى انا التعبان
اوعاك تؤول عَلَيْ انسان
تلاقي بيخبط الباب سجان
يؤُلِّي مطلوب تيجي والولدان
دئيأة نسألك وتعود بامان
اغيب اعوام ما ليش عنوان
لاني انا المصري
صرخت وؤُلت النيل رواني
انا المجني عليه مش الجاني
مولود فيها وطينتي اسواني
اسكندراني صعيدي جواني
يئلعوا سناني ويئطعوا لساني
لاني ورثتها مسلم ونصراني
لكني انا المصري
مهما صرخت وأُلت يا سادة
عيشي كرامتي وحريتي عبادة
يؤولولي انت مش لابس بيادة
تبقي انت العبد واحنا الساده
انت الارهاب ريحتك فايحة معتادة
اكتم حزني جوايا اموت كمدان
لاني انا المصري
ش/علي عبدالله آل العتامنة
الجمعة 25/9/2020
ليست هناك تعليقات:
إرسال تعليق